شعری لطیفہ

*تصوير* جاناں

= چارلوگ ؛ چارسوچ =

ایک بادشاہ کے سامنے چار آدمی بیٹھے تھے.
(١) اندھا (٢) فقیر (٣) عاشق (۴) عالم۔
بادشاہ نے یہ مصرعہ کہہ دیا

" اس لیے تصویر جاناں ہم نے کھنچوائی نہیں"

اور سب کو حکم دیا کہ اس سے پہلے مصرعہ لگا کر شعر پورا کرو.

(1) اندھے نے کہا:
"اس میں گویائی نہیں اور مجھ میں بینائی نہیں،
اس لیے تصویر جاناں ہم نے کھنچوائی نہیں"

(2) فقیر نے کہا:
"مانگتے تھے زر مصور جیب میں پائی نہیں،
اس لیے تصویر جاناں ہم نے کھنچوائی نہیں"

(3) عاشق نے تو چھوٹتے ہی کہا:
" ایک سے جب دو ہوئے پھر لطف یکتائی نہیں،
اس لیے تصویر جاناں ہم نے کھنچوائی نہیں"

(4) عالم دین نے تو کمال ہی کر دیا، فرمانے لگے:
" بت پرستی دین محمد ﷺ میں کبھی آئی نہیں،
اس لیے تصویر جاناں ہم نے کھنچوائی نہیں"

سوچ کا زاویہ ہر ایک کا الگ ہوتا ہے اور ہر کسی کا زاویہ نگاہ اس کے مطالعہ ، مجالست اور تربیت کے حساب سے ہوتا ہے ، مثبت زاویہ نگاہ ہر ترقی کا زینہ ہے...!